ತುಲುನಾಡ್ ದ ಕೊಡಿ
🔵 ಎತ್ತರೆತ್ತರಾ ರಾವೊಂದು ಮೆನ್ಕೊಡ್ ತುಳುನಾಡ್ ದಾ ಕೊಡಿ..😍😍 🔵
ಕೇಪುಳ ರಂಗ್ ದಾ ಸೂರ್ಯ ಚಂದ್ರೆ ರ್ ಶುಭ್ರ ಬಣ್ಣೊಡ್ ಮೆನ್ಕೊಂದು ಇಪ್ಪುನ ತುಳುನಾಡೋರ್ಮೇ ರಾಪುನ ಅಧಿಕಾರ ಇಪ್ಪುನ ಕೊಡಿ. ಈ ಕೊಡಿ ತುಳುನಾಡುದ ಇತಿಹಾಸ ನಂಬಿಕೆ ಆಚಾರ ವಿಚಾರ ಸೌಹಾರ್ದತೆ ದ ಸಂಕೇತ. ಕೊಡಿಟ್ ಇಪ್ಪುನ ಪ್ರತಿ ಒಂಜಿ ಅಂಶೋಡ್ ಪೊರ್ಲಾಗಂಟುದ ಅರ್ಥ ಉಂಡು ಐತಿಹ್ಯ ಉಂಡು. ತುಳುನಾಡುದ ದೈವರಾಧನೆನ್, ದೇವಾರಾಧನೆ ನ್ , ತುಳುನಾಡು ನ್ ಆಳಿನಾ ರಾಜಾ ಮನೆತನ ನ್, ತುಳುನಾಡು ದ ಜನಕ್ಲೆನ ಸ್ವಭಾವನ್ ಈ ಕೊಡಿಟ್ ತೊಜಿಪವುನ ಪ್ರಯತ್ನ ನ್ ನಮ್ಮ ಪೆರಿಯಕ್ಲ್ ಮಲ್ದೆರ್.
ಈ ಕೊಡಿಕ್ಲಾ ದೈವಾರಾಧನೆಗ್ಲಾ ಅವಿನಾಭಾವ ಸಂಬಂಧ, ದೈವೊಲೆಗ್ ನೇಮ ಕೊರ್ಪಿನ ಪೊರ್ತುಡು ದೈವ ಪಾತ್ರಿ ಗಲಸುನ ಕುಂಟುದ ಬೆರಿತಾ ಭಾಗಡ್, ದೈವ ಪಾತ್ರಿನಾ ಅಣಿ ಟ್ ಕೇಪುಳ ರಂಗ್ ದಾ ನಡುಟು ಸೂರ್ಯ ಚಂದ್ರೆ ರ್ ಇಪ್ಪುಂಡು.
ಕೊಡಿಟ್ ಇಪ್ಪುನ ಕೇಪುಳ ಕುಂಕುಮ ರಂಗ್ ತುಳುನಾಡುದ ದೈವಾರಾಧನೆ ಡ್ ದೇವೆರ್ನ ಕಾರ್ಯೋಡ್ ಬೇತೆ ಒವ್ವೆ ರೀತಿದ ಎಡ್ಡೆ ಕಾರ್ಯೋಲೆಡ್ ಗಲಸುನೈಟ್ ಅಗ್ರಸ್ಥಾನೋಡ್ ಇಪ್ಪುನ ಕೇಪುಳ ಪೂ ತಾ ರಂಗ್ ರ್ದ್ ಬೈದುಂಡ್. ಕುಂಕುಮ ರಂಗ್ ಮಹತ್ವಾಕಾಂಕ್ಷೆ,ಧೈರ್ಯ ಬೊಕ್ಕ ಆತ್ಮವಿಶ್ವಾಸ ನ್ ಪ್ರತಿನಿಧಿಸವುಂಡು, ತುಳುವೆರೆನ ಸ್ವಭಾವ ಲಾ ಅಂಚನೇ ಉಂಡು, ಓಲು ಪೋಂಡಲ ಎಂಚ ಇತ್ತುಂಡಲ ಬದುಕು ಡ್ ದುಂಬು ಬರೋಡು ಪನ್ಪಿನ ಆಸೆ ಇಪ್ಪುಂಡು, ಐಕ್ ಸಲದ್ ಒವೆನ್ಳ ಎದುರು ಪಾಡೊಂಡ್ರಲಾ ಪೊಡ್ಯುಜೆರ್. ಆಲೂಪೆರ್ನ ಕೊಡಿತಾ ರಂಗ್ ಲಾ ಕುಂಕುಮ ರಂಗ್ ಡ್ ಇಪ್ಪುನವ್ವು ಪಂದ್ ಕೆಲವು ಇತಿಹಾಸಗಾರೆರ್ ಪನ್ಪೇರ್. ತುಳುನಾಡುದ ಇಲ್ಲಲೇಡ್ ಇಪ್ಪುನ ತುಳಸಿಕಟ್ಟೆ ಲೆದಾ ರಂಗ್ ಲಾ ಕುಂಕುಮ ರಂಗ್ ಡೇ ಇಪ್ಪುಂಡು.
ಕೊಡಿಟ್ ಇಪ್ಪುನ ಸೂರ್ಯ ಚಂದ್ರೆರ್ ತುಳುನಾಡ್ ದಾ ಭವಿಷ್ಯ ಬೊಕ್ಕ ಇತಿಹಾಸ ನ್ ಪ್ರತಿನಿಧಿಸವುಂಡು. ತುಳುವೆರನ ಆಚಾರ ವಿಚಾರಲೆಡ್ ಸೂರ್ಯ ಚಂದ್ರೆ ರೆಗ್ ವಿಶೇಷ ಸ್ಥಾನ ಉಂಡು ಅಂಚಾದ್ ತುಳುನಾಡುದ ಪ್ರತಿಯೊಂಜಿ ಇಲ್ಲಾಲ್ ಇಪ್ಪುನ ತುಳಸಿ ಕಟ್ಟೆಲೆಡ್ ಸೂರ್ಯ ಚಂದ್ರೆರೇನ ಚಿತ್ರ ಇಪ್ಪುಂಡು. ದೇವಸ್ಥಾನಲೆಡ್ ಶಾಸನಲೆಡ್ ಲಾ ಸೂರ್ಯ ಚಂದ್ರೆರೆನ ಚಿತ್ರ ಕೆತ್ತನೆ ಮಲ್ತ್ತ್ ಇಪ್ಪುವೆರ್. ತುಳುನಾಡ್ ದ ದೈವ ನುಡಿಕ್ಲೇಡ್ ಸೂರ್ಯ ಚಂದ್ರೆರ್ ಇಪ್ಪುನೆಟ ದೈವೊಲ್ ಇಪ್ಪುವ ಆತ್ನೆಟಾ ತುಳುನಾಡ್ ನ್ ಪೊರ್ಲುಡ್ ಕಾಪುನ ಜಬದರಿಗೇ ದೈವೊಲೆದ ಮಿತ್ತ್ ಇಪ್ಪುಂಡು ಪನ್ಪುನ ಪಾತೆರಾ ಬರ್ಪುನ್ಡು. ಆಲೂಪೆರೆನ ಲಾಂಛನ ಡ್ ಲಾ ಸೂರ್ಯ ಚಂದ್ರೆರ್ ಇಪ್ಪುಂಡು. ಉಂಧು ತುಳುವೆರ್ ಪ್ರಕೃತಿತಾ ಮಿತ್ತ್, ದೈವೊಲೆದ ಮಿತ್ತ್ ದೀತಿನ ನಂಬಿಕೆನ್ ತೋಜಾವುನ್ಡ್.
ಸೂರ್ಯ ಚಂದ್ರೆರ್ ನಾ ಉಲಯಿ ಇಪ್ಪುನ ಬೊಲ್ದ್ ರಂಗ್ ತುಳುವೆರ್ನ ಶುಧ್ದ ಮನಸ್ ಬೊಕ್ಕ ನಾನಾ ನಮೂನೆದ ಜಾತಿ, ಭಾಷೆ, ಧರ್ಮದಾ ನಡುಟು ಇಪ್ಪುನ ಸೌಹಾರ್ದೆನ್ ತೊಜಿಪಾವುಂಡು. ಇತ್ತೆದ ಕಾಲೋಡ್ ರಾಜಾಕಿಯದ ಕಾರಣೊಡು ತುಳುವೆರನ ನಡುಟು ಧರ್ಮ, ಜಾತಿ ದಾ ವಿಸಯ ಡ್ ಮನಸ್ತಾಪ ಬರೊಂದ್ ಇತ್ತುಂಡಲ ದುಂಬುದ ಕಾಲೋಡ್ ಇಂಚ ಇಜ್ಜಂಡ್ ಮಾತೆರ್ಲ ಸಹಬಾಳ್ವೆಡ್ ಬದುಕೋಂದು ಇತ್ತೆರ್. ತುಳುನಾಡ್ ಶಾಂತಿ ಡ್ ಇತ್ತುಂಡ್. ಆ ಶಾಂತಿ ಸಹಬಾಳ್ವೆದ ಸಂಕೇತನೇ ಬೊಲ್ದ್ ರಂಗ್.
ಕೇಪುಳ ರಂಗ್ ಧೈರ್ಯೋಗ್, ಬೊಲ್ದ್ ರಂಗ್ ಶಾಂತಿಗ್ ಸೂರ್ಯ ಚಂದ್ರೆರ್ ಸಂಸ್ಕೃತಿ ಗ್ ಪ್ರತೀಕವಾದ್ ಇಪ್ಪುನ ತುಳುನಾಡ ಕೊಡಿ ಬಾನೆತ್ತರಡ್ ರಾವೊಡು. ಜಾತಿ ಮತ ಧರ್ಮ ದ ಭೇದೋಲೆನ್ ಬುಡುದ್ ಇಡೀ ತುಳುನಾಡೇ ನಮ್ಮ ಕೊಡಿಯಡಿಟ್ ಒಂಜಾವೊಡು. ತುಳುವಪ್ಪೆನ ಕೈಟ್ ತುಳು ಕೊಡಿ ಮೆನ್ಕೊಂದು ಇಪ್ಪೊಡು.
✒Gururaj Karkera
Comments
Post a Comment